MOTHAK TAO NGAJHI (Kera Bisa Mengaji)

Mothak tao ngajhi Pasarèyanna Kyaè Ali, sèkalonta kalabân sebbhudhân Asta Ghumo’. 

È mongghing tèmorra Kottha Songennep bâḍâ sèttong dhisa anyama Ḍhisa Kalimo’o’. neng dhisa ka’ḍinto bâḍâ Kampong Bhârângbhâng. Neng Bhârângbhâng ka’ḍinto bâḍâ sèttong olama’ sè kalonta kalabân sebbhudhân Kè Bhârângbhâng asmaèpon, 

Kyaè Ali. Kyaè Ali ka’ḍinto pottra lakè’na Kyaè Hatib Paddhusan, jhughân aropa’aghi bâjâèpon Pangèran Katandur. Kyaè Ali ka’ḍinto salasèttong olama’ sè èkasengkaè, tor nyebbhârraghi aghâma islam kong-langkong molang èlmo tasawwuf. Kyaè Ali sabbhân arèna morok ngajhi. 

Kacator è ḍâlem carèta, è sèttong bâkto Kyaè Ali ngaollè kaparcajâ’ân dari Rato Songennep, Rato Panembhâ’ân Somala, kaangghuy morok pottrana rato sè asmana Radhin Arja Tirtadinèngrat sè èkennal sareng jhulughân Sultan Abdurrahman. Sultan Abdurrahman sabbhân arè ajhâr ngajhi bân èlmo aghâma apolong sareng santrè sè laèn. Èkala’ panḍâ’na carèta Sultan Abdurrahman ka’ḍinto cè’nakalla tor cè’ bhuḍhuna, kantos è sèttong bâkto Sultan Abdurrahman èpokol otabâ èpeccot sareng Kyaè Ali, kantos kapyarsa ḍâ’ Rato Panembhâ’ân Somala. È bâkto ka’ḍinto jhughân Rato Panembhâ’ân Somala dhuka, tor marènta sala sèttong pongghâbâ karaton kaangghuy mapak ḍâ’ kyaè Ali sopajâ nyabis ḍâ’ Rato Panembhâ’ân somala. 

Saamponna Kyaè Ali nyabis ḍâ’ rato, Rato Panembhâ’ân Somala pas marèksanè bhâ’ bhenḍerrâ dhika mokol otabâ meccot ana’ bulâ. Kyaè Ali mator èngghi lerres ka’ḍinto rato. Rato marèksanèpolè. Bhâ’ napè marghâna dhika sampè’ mokol otabâ meccot ana’ bulâ. Kyaè Ali mator bhâdhân kaulâ kan kantos mokol otabâ meccot polaèpon radhin ka’ḍinto cè’ beḍḍellâ ban cè’ bhuḍhuna, maksot bhâdhân kaulâ ta’ mokola otabâ meccodhâ orèngga, nangèng maèlanga bhuḍhuna, 

Rato Pnembhâ’ân Somala pas aḍhâbu, mon bârinto dhika bisa maèlang beḍḍhel bân kabhuḍhuwan, kyaè Ali mator ngèstowaghi ḍâbu, manabi Allah kasokan tor aparèng. Rato pas aḍâbu, nèko’ bulâ anḍi’ mothak cè’ beḍḍhellâ ban cè’ bhuḍhuna, patoro’ oca’, paèlang bhuḍhuna, jhâ’pabâli sabellunna pènter. Kyaè Ali motor ngèstowaghi ḍhâbu ajunan rato. Ka’ḍinto Karaton Songennep. Kyaè Ali ghubhâr sambi nonton mothak. Sabbhân kyaè Ali morok santrèna motagghâ è panggher è paddhuna langghâr. 

Kyaè Ali makon ka sadhâjâ santrèna, sabbhân ngajhiya èpakon abhâkta lèntè sabbhân ongghâ ka langghâr, santrè èpakon meccot mothak kasebbhut. È sèttong bâkto mothak acerrèng sakè’,sake. È sèttong bâkto mothak ka’ḍinto è kabhâreng ajhâlâ jhuko’, mothak ka’ḍinto pas èpanegghu’ opet. Opet èngghi ka’ḍinto seppeddhâ nyèyor sè èpèntè nyaropaè tampar mènagka obhur. Kyaè Ali pas aḍâbu ḍâ’ ka mothak, hè mothak tegghu’ opet rèya jhâ’ sampè’ ocol, sabellunna ḍâpa’ ka tanangnga. Mon la ḍâpa’ ka tanangnga pas arassa panas, abâlâ ka sèngko’. 

Mothak lajhu atoro’ ḍâbuna kyaè Ali. Saellana kyaè Ali abak abit sè ajhâlâ, opet ampon karè ḍâ’-panḍâ’ apoyya ḍâpa’ kaghârighi’na mothak, mothak pas lajhu acerrèng, panas kyaè ali, panas kyaè ali, panas kyaè ali, è bakto ka’ḍinto jhughân kalabân kasokannèpon Allah sè Maha Kobâsa mothak bisa acaca. Mothak pas lajhu èghibâ mole sareng kyaè Ali kaangghuy èyajhâri ngajhi. 

Saamponna ka’ḍinto mothak pas pènter ngajhi. Mothak bisa ngajhi, nanḍâ’âghi mothak ampon ḍâpa’ ḍâ’ baktona kaangghuy èpabâli ḍâ’ ka kraton. Saḍâpa’na ka karaton Kyaè Ali mabâḍâ papangghiyân agung kalabân Rato Panembhâ’ân Somala jhughân sadhâjâna pongghâbâ karaton kaangghuy mabâḍâ salameddhân. Saamponna paḍâ rampong salameddhân pas èmolaè. 

Mothak kalabân Kyaè Ali èparèngè al-Quran, ngoladhi mothak bisa ngajhi kalabân pènter, rato jhughân sadhâjâna ponggâbâ karaton kasambu’. 

Saamponna mothak ampon lastarè ngajhi, Kyaè Ali pas ngontallaghi geḍḍhâng ka mothak, pas aḍhâbu èlmo kala kabâbâtek. 

Maksottèpon sanajjân bânnya’ èlmona tapè bâbâtegghâ jhubâ’. Taḍâ’ ghunana. Rato nyaruju’i ḍhâbuna Kyaè Ali. 

Kyaè Ali sèdhâ taon: 1092 Hijjriyah. 

Pasarèyannèpon bâḍâ neng Dhisa Kalimo’o’, Kampong Bhârângbhâng, sè langkong èkennal kalabân Asta Ghumo’.